"2005 yilning 1 mayidan boshlab ish haqi, pensiyalar, stipendiyalar va ijtimoiy nafaqalar miqdorini oshirish to'g'risida"

O'zbekiston Respublikasi Vazirlar Mahkamasining Q'arori

Respublika aholisining turmush darajasini yanada oshirish va fuqarolarga ijtimoiy madadni kuchaytirish maqsadida:

1. 2005 yilning 1 mayidan boshlab byudjet muassasalari va tashkilotlari xodimlarining ish haqi, barcha turdagi pensiyalar va ijtimoiy nafaqalar, oliy o‘quv yurtlari talabalarining, o‘rta maxsus, kasb-hunar o‘quv yurtlari o‘quvchilarining stipendiyalari 1,2 baravar oshirilsin.

2. 2005 yilning 1 mayidan boshlab O‘zbekiston Respublikasi hududida eng kam:

ish haqi - oyiga 7835 so‘m;

yoshga doir pensiyalar - oyiga 15505 so‘m;

yagona tarif setkasi bo‘yicha boshlang‘ich (nolinchi) razryad - oyiga 7835 so‘m;

bolalikdan nogironlarga beriladigan nafaqa - oyiga 15505 so‘m;

zarur ish stajiga ega bo‘lmagan keksa yoshdagi va mehnatga layoqatsiz fuqarolarga beriladigan nafaqa oyiga 9390 so‘m miqdorida belgilansin.

3. 2005 yilning 1 mayidan boshlab O‘zbekiston Respublikasi Prezidentining 2003 yil 27 martdagi PF-3227-sonli Farmoni bilan uy-joy kommunal xizmatlarga haq to‘lash bo‘yicha oylik kompensatsiya pul to‘lovlari joriy etilgan byudjet tashkilotlari xodimlaridan ayrim toifalarining ish haqi o‘rta hisobda 1,35 baravar oshirilsin va mazkur kompensatsiya to‘lovlari bekor qilinsin, jumladan mazkur Farmonning 1-bandiga muvofiq 1,2 baravar oshirilsin, qolgan qismi esa - bekor qilinadigan kompensatsiya pul to‘lovlari hisobidan amalga oshirilsin.

4. 2005 yilning 1 mayidan boshlab uy-joy kommunal xizmatlar haqini to‘lash bo‘yicha oylik kompensatsiya pul to‘lovlari eng kam ish haqiga nisbatan tabaqalashtirilgan miqdorlarda beriladigan shaxslar imtiyozli toifalarining yangilangan ro‘yxati ilovaga muvofiq tasdiqlansin.

5. Belgilab qo‘yilsinki, ish haqiga qo‘shiladigan ustama va qo‘shimcha haqlarning barcha turlari, shuningdek pensiyalar, ikki yoshgacha bo‘lgan bolalarni tarbiyalayotgan onalarga, bolali oilalarga beriladigan nafaqalar hamda eng kam ish haqiga nisbatan belgilangan kompensatsiya va boshqa to‘lovlar 2005 yilning 1 mayidan boshlab mazkur Farmonda belgilangan eng kam ish haqi miqdoridan kelib chiqqan holda amalga oshiriladi.

6. O‘zbekiston Respublikasi Mehnat va aholini ijtimoiy muhofaza qilish vazirligi vazirliklar, idoralar, Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari, byudjetdan moliyalanadigan tashkilot hamda muassasalar bilan birgalikda pensiyalar, nafaqalar, stipendiyalar, byudjet muassasalari va tashkilotlari xodimlarining mansab maoshlari miqdorini mazkur Farmondan kelib chiqqan holda o‘z vaqtida qayta hisoblab chiqishni ta’minlasin.

7. Byudjet muassasalari va tashkilotlari xodimlarining ish haqi, pensiyalar, nafaqa va stipendiyalarning oshirilishi bilan bog‘liq xarajatlar Respublika Davlat byudjeti va O‘zbekiston Respublikasi Moliya vazirligi huzuridagi byudjetdan tashqari Pensiya jamg‘armasi hisobidan amalga oshirilsin.

8. Xo‘jalik hisobidagi korxona va tashkilotlar 2005 yilning 1 mayidan boshlab mazkur Farmonda belgilangan eng kam ish haqiga muvofiq ishlab chiqarish samaradorligi oshirilgan va mehnat sarfi kamaytirilgan taqdirda ish haqi miqdorini oshirsin.

9. Quyidagilar:

O‘zbekiston Respublikasi Prezidentining 2004 yil 1 iyuldagi PF-3450-sonli Farmoni;

O‘zbekiston Respublikasi Prezidentining 2003 yil 27 martdagi PF-3227-sonli Farmoni ilovasi o‘z kuchini yo‘qotgan deb hisoblansin.

10. O‘zbekiston Respublikasi Adliya vazirligi bir oy muddatda qonun hujjatlariga mazkur Farmondan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

11. Mazkur Farmon matbuotda e’lon qilinsin.

O'zbekiston Respublikasi Prezidenti
I. Karimov
Toshkent shahri,
2005 yil 13 aprel