Eksport va importni moliyalash

		Hozirgi vaqtda Milliy bank va uning barcha bo'lim hamda filiallari o'z mijozlariga ularning tashqi iqtisodiy faoliyati yuzasidan, jumladan xalqaro amaliyotda qabul qilingan barcha shakllarda har qanday murakkablik darajasidagi xalqaro hisob-kitoblarni amalga oshirish, mijozlarga malakali maslahatlar, xususan valuta nazoratining amaldagi tizimi hisobga olinadigan tashqi savdo kontraktlari to'lov shartlari to'g'risida maslahatlar berish, individual hisob-kitob sxemalarini ishlab chiqish bo'yicha kompleks xizmatlar ko'rsatishni taklif qilayapti.

O'tkazma operatsiyalar eksport bo'yicha ham, import bo'yicha ham hisob-kitob qilishning asosiy shakli hisoblanadi.

Milliy bank Banklararo hisob-kitob markazi Loro vakil banklar uchun "yumshoq" va "qattiq" valutalardagi hisob-kitoblar bo'yicha kliring markazi vazifasini bajaradi. Kliring xizmatlari ko'rsatishda to'lovlarga ishlov berishning zamonaviy ilg'or texnologiyalaridan foydalaniladi. Banklararo hisob-kitob markazi "Abraksis" operatsion dasturiy tizimi yordamida barcha hisob-kitoblarni yuqori darajadagi ishonchlilik bilan, real vaqt rejimida bajaradi.

Milliy bank O'zbekistonda SWIFT tarmog'idan foydalanuvchilar guruhida yetakchilik qilmoqda.

Bank o'z mijozlariga hujjatli akkreditivlar shaklidagi hisob-kitoblarni, inkasso va kafolat operatsiyalarini amalga oshirishda xizmat ko'rsatmoqda.

Milliy bank O'zbekiston eksportini, avvalo yigiruv-to'quv va to'qimachilik sanoati mahsulotlari, shuningdek paxta eksportini kengaytirishda yordam beruvchi akkreditiv va kafolat operatsiyalarini faol rivojlantirayapti. Milliy bank akkreditivlari qoplama o'tkazilishini talab qilmasdan, ochilgan kredit yo'nalishlari hisobidan jahonning bir qancha yetakchi banklari tomonidan tasdiqlanayapti.

Milliy bank hisob-kitoblarda akkreditivlarning barcha turlaridan foydalanmoqda, savdo bitimlari bo'yicha hisob-kitob sxemalarini ishlab chiqmoqda. Bu esa, savdoni moliyalashning har xil shakllaridan foydalanish imkonini bermoqda. Bank akkreditivlarni qoplama bilan ham, qoplamasiz ham bajarayapti, natijada mijozlar xorijiy bankalarning kredit yo'nalishlaridan foydalanish orqali o'z oborot mablag'lari uzoq vaqtga chetga jalb etilmasligiga muvaffaq bo'lishmoqda. Holbuki, xorijiy banklarning bunday kredit yo'nalishlari hajmi 500 mln. AQSh dollarini tashkil etadi.

Respublikamiz va MDH mamlaktlaridagi Loro vakil banklar o'rtasida moliyaviy vositachi hisoblanadigan Milliy bank emitent bank, ijrochi, avizolovchi hamda tasdiqlovchi bank vazifasini bajarishga doim tayyor.

Bank xalqaro andozalarga hamda yangi tahrirdagi Xalqaro savdo palatasining birxillashtirilgan qoidalariga (IC №500), shuningdek xalqaro bank me'yorlariga mos keluvchi boshqa moliyaviy vositalarga muvofiq, o'zbekistonlik tovar yetkazib beruvchilar bilan hisob-kitob qilishning akkreditiv shaklini joriy etish yuzasidan Rosssiya, Ukraina va Belorussiyaning yetakchi banklari bilan faol ish olib borayapti.