AFIRATO

2000 yilning may oyida O‘zmilliybank bilan u a’zo bo‘lgan Osiyo va Tinch okeani mamlakatlarini rivojlantirish moliya muassasalari uyushmasi (AFIRATO) o‘rtasida Internet global tarmog‘i orqali AFIRATOga a’zo mamlakatlar (35 mamlakatdagi 79ta taraqqiyot banki) orasidagi Bank mijozlariga xizmatlar ko‘rsatish bilan bog‘liq SMECENTER.COM loyihasini birgalikda amalga oshirish to‘g‘risida Memorandum imzolandi. SMECENTER.COM, bu – Osiyo-Tinch okeani mintaqasidagi kichik va o‘rta korxonalar uchun Internet tarmog‘ida ochilgan veb-port bo‘lib, unga kirish manzili: www. smecenter.com.

SMECENTER.COM loyihasi respublikamizning kichik va o‘rta korxonalariga reklama faoliyati olib borish, xalqaro eksport bozorlarini o‘rganish hamda mamlakatimizdagi kichik va o‘rta biznes korxonalari tovar va xizmatlari uchun chet mamlakatlardan potensial xaridorlar topib, bevosita savdoni yo‘lga qo‘yish imkonini beradi.

AFIRATOga a’zo banklar orasida Eksport Xizmatlarini Qo‘llab-quvvatlash (ESF) bo‘yicha UNCTAD/WTO (ITC) Xalqaro Savdo Markazi loyihasining tarmog‘i hisoblanuvchi ushbu loyiha AFIRATO Direktorlar Kengashining 1999 yil 24 sentyabrda Gavayya orollarining Gonolulu shahrida bo‘lib o‘tgan 50-yig‘ilishida ma’qullandi hamda keyinroq AFIRATO Bosh assambleyasi tomonidan tasdiqlandi.

Tegishlicha ro‘yxatdan o‘tgan har bir korxonaga keng doiradagi xizmatlar ko‘rsatiladi. Bular, jumladan:

	O‘z veb-saytiga ega bo‘lishni xohlovchi kompaniyalar uchun “O‘zingga veb-sahifa tayyorla” to‘plami;
	Internet tarmog‘ida andozaviy biznes-sahifa ochib, unda korxona to‘g‘risida umumiy ma’lumotlar berish (masalan: korxona nomi va manzili, elektron pochta manzili, aloqa bog‘lash mumkin bo‘lgan shaxs, ishlab chiqariladigan mahsulot hamda ko‘rsatiladigan xizmatlar nomenklaturasi va h.k.);
	Zarur mahsulot, xom ashyo (kompaniyalar)ni izlab topish;
	Agar bor bo‘lsa, ro‘yxatdan o‘tgan firma veb-sayti bilan aloqa;
	Internet tarmog‘ida bepul elektron pochta manzili;
	Global tarmoqda samarali interaktiv qatnashish maqsadida korxonani reklama qilish (reklamadagi sarlavhadan korxona “veb-sahifa”siga o‘tishda foydalanish).

Infratuzilma to‘liq shakllantirilganidan keyin e-savdo va e-tijorat kabi xizmatlar ishga tushiriladi. Ushbu dastur kichik va o‘rta biznes milliy korxonalari uchun bir qancha afzalliklarga ega. Bular:

	Interaktiv ishtirok. Hamkorlarni, ularning rekvizitlarini izlab topish, hujjatlar aylanishi, yozishmalar olib borish bilan bog‘liq va boshqa chiqimlar yo‘qligi munosabati bilan kompaniya mahsulotini arzimagan narx evaziga butun dunyoga bir zumda namoyish qilish;
	Global reklama. Kuniga 24 soat, haftasiga 7 kun, yiliga 365 kun mobaynida mahsulotni potensial xorijiy bozorlarda namoyish qilish; Sotuvlar hajmi ko‘payishi. Sizning biznesingiz amalda kuniga 24 soat davomida ochiq bo‘ladi;
	Yakuniy sotuv imkoni juda yuqori bo‘ladi, chunki buyurtmachilar mahsulot, xizmatlar va kompaniya to‘g‘risida eng yangi ma’lumotlarni olib turadilar;
	Xizmatlar arzonlashadi – bazadan foydalanuvchilar uchun har yili ro‘yxatdan o‘tish badali AFIRATO tomonidan 12 AQSh dollari miqdorida belgilangan. O‘zingizga “veb-sahifa” ochish uchun yiliga 30 AQSh dollari miqdorida qo‘shimcha badal to‘lashingiz zarur. Bu mablag‘ni to‘lov kunidagi tijorat kursi bo‘yicha milliy valutada ham to‘lasa bo‘ladi.

Ushbu dasturda qatnashishni istovchi korxonalar o‘zlariga eng yaqin joylashgan Milliy bank bo‘limiga murojaat qilib, tegishli shakldagi blankni zarur ma’lumotlar bilan to‘ldirishlari hamda Bank bilan shartnoma tuzishlari kerak.